wong zoe的部落格

來源: 蘋果日報 (2015.7.26)

韓劇《主君的太陽》男星蘇志燮繼上年之後，噚晚再喺台灣舉行粉絲見面會。外表cool到爆但實質係大暖男一名嘅佢，喺見面會上繼續冧爆在場超過3,000名粉絲，出場時粉絲嘅歡呼聲雖然令蘇志燮怕醜微笑，但到之後表演嘅時候蘇志燮就變得勁high，仲首次演唱佢嘅新歌《So Ganzi》。

見面會上，蘇志燮就多次提到自己肥咗好多，不過又話去到台灣呢個美食天堂，加上本身好鐘意食辣嘢，就打消咗減肥嘅念頭。蘇志燮又講到出門旅行時，就會完全放低演員身分，做返自己，會搭經濟艙之外，仲自爆曾經試過旅行時唔沖涼，就咁着件輕便衫，踼對拖就行。蘇志燮仲話試過搭飛機嘅時候遇過一個大叔擘大對腳咁坐，自私行為令佢好無奈。

而被問到平時去旅行都會帶咩時，蘇志燮就話會帶書同埋蠟燭，而一直單身嘅佢，仲漏口話自己好想帶住個女朋友手牽手咁去旅行，可惜仲未有機會。

另外，蘇志燮喺見面會上因為着住西裝現身嘅關係，喺訪問期間都熱到大汗疊細汗，搞到佢係咁抹汗，而粉絲亦趁機大叫「脫、脫」，令蘇志燮尷尬儍笑。