wong zoe的部落格

OPPA今日的西裝加煲呔LOOK好帥呀

來源: 蘋果日報 (2016.3.19)

今晚喺邵氏片場舉行嘅第二屆amfAR慈善晚會，星光熠熠，唔少國際影星都有出席，包括韓國男星蘇志燮、荷李活男星艾德烈邦迪（Adrien Brody）兩大型男。

首次參與amfAR慈善晚會嘅蘇志燮，表示對amfAR好有興趣，日後都會關注多啲amfAR Ball。問佢今次會唔會順便遊覽一下香港？佢就話：「未有時間，每一次炊港都很忙，希望下次沒那麼忙的時候，可以來香港遊覽。」講到今次amfAR Ball有好多國際巨星出席，佢話：「我是碧咸（David Beckham）的粉絲，所以都很希望與碧咸太太（Victoria Beckham）見面。」問佢有冇睇近日全城熱睇、由宋仲基、宋慧喬主演嘅韓劇《太陽的後裔》？蘇志燮話：「未看，但我5月將會與宋仲基合作拍電影。」

同場嘅艾德烈捐出一幅自己親手畫、以龍做主題嘅畫作拍賣，佢話舊年自己休息咗一年，做咗好多藝術創作，內容圍繞美式文化、美式fast food之類，仲自爆好鍾意龍：「因為我很喜歡龍和中國文化，自己屋企的後花園都有這類型建築及設計。」問佢幅龍畫用咗幾耐時間創作？佢就會錯意話：「平時創作都要視乎情況而定，有時候會用數日，有時候數個禮拜。」