wong zoe的部落格

來源: 全星網(2016.4.8)

http://hk.apple.nextmedia.com/enews/realtime/20160408/54961930

韓國新一代男神宋仲基憑KBS新劇《太陽的後裔》人氣爆燈，佢本周一嚟咗香港，同宋慧喬出席周二舉行嘅ViuTV開台劇記者會，之後宋仲基就留喺香港，有指佢同家人喺香港度假，而前日宋仲基亦曾經被粉絲捕獲。

不過今日網上就流傳三張宋仲基嘅新照，據上載嘅網民話宋仲基正在拍緊廣告中，有粉絲問宋仲基係唔係喺北京，該名上載照片嘅網民就話宋仲基仲喺香港，估計宋仲基除咗留港旅行外，亦都順便拍廣告搵真銀。而剛剛宋仲基又被人捕獲，當中地點包括文武廟、中環同尖沙嘴，不過照片中宋仲基就先後換咗兩套衫，加上隨行有攝影師跟拍，估計佢喺幫雜誌拍攝，而唔少粉絲都成功追訪到佢，只見Oppa雖然被追訪，但態度都好友善。

另外，由宋仲基、黃政民、蘇志燮主演嘅新片《軍艦島》將於6月喺春川進行拍攝，估計宋仲基完成香港之旅後，就開始為新片做準備。

而韓國綜藝節目《Happy Together》噚日播出嘅一集中就拿近日爆紅劇《太陽的後裔》做話題，當中內地主持人張玉安就提到《太陽》男主角宋仲基成為咗內地嘅國民老公，佢話：「最近喺中國，宋仲基成為咗國民老公，就算係有男朋友嘅人亦都會話宋仲基係自己嘅老公，甚至因為《太陽的後裔》有些人嘅夫妻關係亦都變得唔好。」

同時《太陽》中飾演Daniel嘅趙泰寬亦都上咗節目，對於傳出緋聞嘅宋仲基同宋慧喬喺拍攝時有冇啲曖昧氣氛時，佢話：「兩個人就好似姐姐同弟弟一樣，關係好好，我冇感覺到佢哋有乜微妙嘅氣流。」之後仲開玩笑話：「也許係演的也說不一定。」即時令全場爆笑。