wong zoe的部落格

來源: 蘋果日報(2016.11.10)

http://hk.apple.nextmedia.com/enews/realtime/20161110/55899442

踏入11、12月有唔少韓星輪住訪港，繼韓國人氣綜藝節目《Running Man》前成員Gary、HaHa、男團Infinite等人之後，韓劇《主君的太陽》男星蘇志燮就接棒於下周六(19號)襲港會港迷！

今年4月先訪港出席飾物品牌J.ESTINA喺香港嘅Pop-up store開幕儀式，隔咗7個月蘇志燮再度襲港，連同OST女王Lyn、b-boys團體Drifterz等人出席於鑽石山荷里活廣場舉行嘅「魅力韓冬旅遊嘉年華」。蘇志燮上次訪港只喺活動上短短現身8分鐘，不過今次佢除咗同粉絲分享最新「韓冬」旅遊情報之外，更會同粉絲玩遊戲，唔再來去匆匆，粉絲可以見偶像耐啲喇！

之後就有「國民初戀」秀智！秀智於9月先訪港為自己嘅蠟像揭幕，不足兩個月秀智再度來港，於本月29號為代言嘅首飾品牌設於銅鑼灣希慎廣場嘅店舖開幕，並舉行粉絲見面會近距離見粉絲。

而韓國人氣獨立樂團STANDING EGG將於下月4號喺九展舉行香港嘅首場演唱會冧港樂迷，據知STANDING EGG一向都好低調又神秘，不過今次佢哋為咗港騷，日前罕有現身拍攝宣傳片，揭開神秘面紗並呼籲樂迷踴躍購票：「與我們一起共度美好快樂時光！」

另外，韓國六人男團VIXX繼上年初喺香港舉行首個粉絲見面會之後，下年2月10號再來港開騷，將於亞博館舉行「VIXX Live Show in Hong Kong 'THE UNDERWORLD'」演唱會，到時粉絲又要撲飛喇！