wong zoe的部落格

來源: 蘋果日報 (2016.11.19)

http://hk.apple.nextmedia.com/enews/realtime/20161119/55939133

韓劇《主君的太陽》男星蘇志燮雖然目前正忙拍新片《軍艦島》，不過仍然抽空訪港，亮相於鑽石山荷里活廣場舉行嘅「魅力『韓冬』嘉年華」，吸引近300粉絲企埋喺二、三樓圍觀。

B-boy組合Drifterz表演完之後，蘇志燮就現身同眾主禮嘉賓進行開幕儀式。一身黑色打扮嘅蘇志燮一現身立即引起粉絲尖叫，蘇志燮亦有向台下粉絲揮手打招呼，佢更暖心地照顧到企喺樓上嘅粉絲。

及後對話環節中，蘇志燮先用韓文打招呼：「大家好，我係蘇志燮。」又稱：「今次係今年第二次來港，可以嚟到呢個活動都好開心、好榮幸。」而粉絲亦用韓文唱生日歌為本月4號39歲生日嘅蘇志燮慶祝，令佢大為感動。

其後被問到推薦嘅韓國旅遊地方，蘇志燮先搞笑地表示「我屋企唔得㗎」，然後就話因為香港冬天唔會落雪，所以建議去江原道睇雪及滑雪，又推薦玩到攰可以食人參雞湯補充體力，又介紹韓劇《Oh My Venus》嘅拍攝場地。

閒談完就到蘇志燮同粉絲玩遊戲嘅時間，5名幸運粉絲透過骰仔贏到點數，分別可以同蘇志燮十指緊扣、深情對望同抱抱，期間主持人一度講錯「可以同Oppa深情擁吻」，令台下粉絲嘩然及尖叫。粉絲得到抱抱時，蘇志燮又主動問粉絲想前面攬攬定back hug，認真識冧粉絲。蘇志燮又送上有親筆簽名嘅摺扇做禮物，並落到台下同粉絲大合照。

臨走前蘇志燮表示：「好耐都冇咁近距離見粉絲，同粉絲玩遊戲，所以今日覺得好開心。」佢更提早同粉絲拜年講新年快樂。