wong zoe的部落格

來源:  蘋果日報 (2017.8.10)

http://hk.apple.nextmedia.com/enews/realtime/20170810/57063873

【更新《軍艦島》香港票房內容】
由韓國男神宋仲基夥拍蘇志燮、黃政民等主演嘅新片《軍艦島》已於上月26號喺韓國上映，而今日亦終於殺到嚟香港，今日正式開畫，而今日《軍艦島》喺香港開畫就撞正荷李活鬼片《詭娃安娜貝爾：造孽》(Annabelle: Creation)及《悟空傳》等同日上映，但《軍艦島》仍獲唔少港迷支持，截至今日下午5點30分，暫時收46.5萬，暫列今日單日票房亞軍。而《詭娃安娜貝爾：造孽》因上映場次比《軍艦島》多，故有55.8萬暫時排冠軍，至於由彭于晏同余文樂主演嘅《悟空傳》，暫時票房有20萬，排單日票房第五位。

至於喺韓國方面，《軍艦島》已經開畫兩星期，票房因上周三由宋康昊、劉海鎮、柳俊烈主演嘅《逆權司機》上映而受到影響，當中《逆權司機》噚日累計觀影人次有逾581萬人次，單日有40萬名觀眾捧場，而韓國時間今日下午2時30分、即《逆權司機》上映第九日已衝破600萬累計觀影人次，認真犀利。事實上，《逆權司機》開畫至今，走勢好凌厲，即使噚日有新片、由朴敘俊、姜河那主演嘅《青年警察》公映，但對《逆權司機》嘅票房都唔受影響，《青年警察》噚日開畫有30萬人支持，累計有逾34萬觀影人次。

而《軍艦島》喺韓國噚日單日不足5萬人捧場，累計有逾630萬觀影人次，由於《軍艦島》要過800萬人次先可以回本，現時走勢似乎有點難度。