wong zoe的部落格

來源: HK01(2018.2.7)

https://www.hk01.com/%E9%9F%93%E8%BF%B7/157873/%E7%8A%AF%E7%BD%AA%E9%83%BD%E5%B8%82-%E5%B0%B9%E5%95%9F%E7%9B%B8-g-o-d%E7%82%BA%E8%A7%92%E8%89%B2%E9%A7%81%E9%AB%AE-%E6%83%A1%E5%BD%A2%E6%83%A1%E7%9B%B8%E5%9A%87%E5%88%B0%E5%BA%97%E5%93%A1%E5%94%94%E6%95%A2%E5%B0%8D%E6%9C%9B

韓國電影《犯罪都市》由馬東石（又譯：馬東錫）同尹啟相主演，《犯罪都市》改編自2004年韓國黑幫真實事件，講述由馬東石飾演嘅韓國刑警帶隊打擊以尹啟相為主嘅黑幫「延邊黑社會」一連串犯罪行動。

馬東石手臂粗到一巴星暈人就係人都知，但大家對於尹啟相嘅認知度就可能較低，其實尹啟相以前都係男團出身，1999年以g.o.d出道同Danny Ahn係同歲朋友，13年公開同李荷妮拍拖後，直到依家都穩定交往中！舊年嘅《2017 Mnet Asia Music Awards in Hong Kong》（MAMA），都係以情侶檔嚟香港出席活動，唔知香港粉絲又有無印象呢？

其實尹啟相喺g.o.d入面算得上係成功轉型做演員嘅一人，睇返尹啟相喺《犯罪都市》入面嘅表現都不俗，加上今次係尹啟相首次挑戰做奸角，徹頭徹尾一改尹啟相深入民心嘅溫柔形象。尹啟相更有主動提出駁長髮，其後更提起︰「無諗過去便利店買嘢會嚇到店員唔敢同我對望」，雖然諗番起係好笑，但如果《犯罪都市》入面嘅張晨真係出現喺自己面對，又真係幾驚想即刻落閘同佢講閂咗門嘅……

雖然尹啟相努力提出有關拍攝細節嘅建議，同時因為角色嘅關係，尹啟相都需要努力學習延邊方言同埋普通話，雖然尹啟相嘅普通話就無100%韓國人嘅陳善圭講得好，但尹啟相就足足花咗2個月學最地道延邊方言，另外，馬東石仲有大爆尹啟相就算當日無行程都會去到拍攝現場，睇得出佢都放咗好多心機落去！