wong zoe的部落格

 來源: 蘋果日報(2014.8.5)

韓劇《主君的太陽》男星蘇志燮，今日傍晚現身觀塘apm商場，出席記者會。換上灰色西裝嘅蘇志燮，唔知係咪因為見到現場迫爆500多名粉絲，似乎有啲嚇親，不時用手巾仔抹汗。

佢一出場先用廣東話同大家打招呼，之後360度轉身同全場粉絲揮手，極之親民。首次來港嘅蘇志燮表示，今朝飛抵香港後就一直未食嘢，不過記者會結束後會去食飯，台下粉絲就推介佢去食燒賣。

問到第一次嚟香港有咩地方想去，蘇志燮話希望可以去電影《重慶森林》中蘇豪區嘅長扶手電梯。蘇志燮話今次嚟香港，主要係想同港迷好好玩樂，創造難忘嘅回憶。佢仲提到自己特別為見面會，用廣東話錄製咗問候短片，不過就話自己其實唔識講廣東話。主持人就教佢講「我愛你哋」，蘇志燮傻笑咁跟住講，粉絲立即冧到瘋狂尖叫。

蘇志燮又話：「因為鍾意電影《英雄本色》，有機會嘅話希望可以同周潤發、劉德華、李連杰及成龍等男星合作。」

問到唔會接拍好似好友宋承憲新片《人間中毒》呢類電影時，蘇志燮立即搖頭否認，表示自己無信心裸露於人前。蘇志燮又話自己唱歌唔好聽，只係識rap，所以未來都係會以演員身份活動。

蘇志燮聽晚會喺九展舉行見面會，之後會飛去上海同新加坡繼續巡演。