wong zoe的部落格

來源: 蘋果日報(2017.8.5)

http://hk.apple.nextmedia.com/enews/realtime/20170805/57004151

被喻為下半年最期待嘅韓片《軍艦島》，已經於上月26號正式喺韓國公映，香港方面亦安排於下周四(10號)公映。而《軍艦島》於上月20號率先舉行VIP試映會，當日4位主演宋仲基、黃政民、蘇志燮、李貞賢更抽空接受本報專訪，大談電影及片中角色。

憑神劇《太陽的後裔》「劉時鎮」一角升呢做男神嘅宋仲基，於新片再演軍人角色「朴武英」，宋仲基就表示唔係刻意揀軍人角色嚟演，而再次演出軍人一角亦唔會感到有壓力：「睇劇本時認為《軍艦島》係一個好好嘅作品，所以決定演出，只係咁啱個角色同樣係軍人而已。就算下次再遇到軍人角色，但只要作品好我都會演出。」不過宋仲基就笑言如果下部作品又係演軍人，就唔知頭髮幾時先留得長。宋仲基又指當兵服役後對演軍人有好大幫助：「例如軍人嘅語氣、敬禮等動作會不知不覺做出嚟。」但佢一度口誤表示在場所有主演都當過兵，立即引起黃政民、蘇志燮及李貞賢爆笑，事關韓國女性係唔需要當兵，黃政民就搞鬼向李貞賢表示「你似乎應該去當一次軍」。

《軍艦島》歷時半年嘅拍攝，一眾演員及工作人員都相當辛苦，宋仲基坦言：「片中有好多槍戰、打鬥、爆破嘅場面，多得工作人員多次嘅準備，我哋一眾演員先可以安心拍攝，而且喺冇發生大事故嘅情況下順利完成，所以我都好有信心講《軍艦島》嘅製作組係韓國最好嘅製作組。同時電影有大量一大班人一齊登場嘅場面，所以體力上有感到辛苦嘅地方，不過出嚟嘅效果好好，好多場面都好帥氣，都係攰得有價值。」對於重現軍艦島真實感嘅片場，經歷長時間拍攝有冇感到壓抑？宋仲基表示：「因為《軍艦島》係寫實嘅電影，所以好努力將真實情景還原畀觀眾，亦因為電影題材嘅關係，當然會感到壓迫感。」

蘇志燮於片中飾演流氓打手崔七星，有唔少打鬥場面，當中一幕要半祼拍攝打鬥戲，冇得戴保護裝置，開拍前有冇擔心過？蘇志燮坦言：「開拍前有擔心過，不事前準備做得好充足，所以冇發生大事故地順利完成拍攝。」蘇志燮續指為咗片中嘅動作戲特訓咗個半月，而且沐浴池該場打鬥戲最能突顯片中人物性格嘅埸面，所以蘇志燮亦表示最滿意呢場戲。