wong zoe的部落格

來源: 蘋果日報(2016.4.16)

http://hk.apple.nextmedia.com/enews/realtime/20160416/54994212

韓劇《主君的太陽》型男蘇志燮今日下午喺沙田新城市廣場出席飾物品牌J.ESTINA嘅Pop-up store開幕儀式，雖然現身只有短短8分鐘，但已令500粉絲心滿意足，狂叫oppa。

蘇志燮着住黑色西裝褸襯白衫出場，全場粉絲即時瘋尖叫，而蘇志燮亦好識做，一上到台就除低黑超電粉絲，仲向周圍粉絲揮手。佢送出禮物畀兩位粉絲，粉絲即刻趁機握手同合照。

蘇志燮用韓文打招呼：「大家好，好開心，我係蘇志燮。」上個月先嚟過香港嘅蘇志燮仲話再次來港好開心，因為每次粉絲都表現得好熱情。

提到於韓劇《Oh My Venus》中飾演健身教練，問蘇志燮有冇難度?佢話：「最辛苦係節食，自己train自己冇問題，但要我教番人就有啲難度，好彩有專家教我點做。」

蘇志燮曾經於另一套韓劇《主君的太陽》中送過頸鏈畀女主角孔孝真，問佢覺唔覺得女仔戴飾物好重要?佢話：「我反而着重個女仔同飾物襯唔襯。」仲畀貼士教女仔要點樣戴飾物先靚，「最緊要自然，唔好浮誇。」

可能趕搭飛機嘅關係，蘇志燮來去匆匆，快閃8分鐘。佢臨走前鞠躬，話希望下次再有機會來港，帶好作品畀大家，佢又用普通話說:「謝謝。」

而喺公開亮相前，蘇志燮率先走去巡鋪，同幸運粉絲作近距離接觸。