wong zoe的部落格

來源: 蘋果日報(2017.6.27)

http://hk.apple.nextmedia.com/enews/realtime/20170626/56879403

由宋仲基、蘇志燮、黃政民、李貞賢、童星金秀安等人主演嘅韓片《軍艦島》，韓國方面今日宣佈定檔於下月26號上映，但劇組日前就被爆料指臨記時薪低過最低工資，引起網民熱烈討論，及後劇組方面發文解釋「唔係事實」，而一眾主演及導演就無受爆料影響，今日齊齊現身於首爾奬忠體育館舉辦嘅新片Showcase。

被問到對其他演員嘅第一印象，金秀安表示：「我睇完《太陽的後裔》之後好鍾意宋仲基Oppa，就連頭像、手機背景畫面都換成Oppa嘅相，所以一直難以集中拍攝(《軍艦島》)，不過我同Oppa冇乜對手戲，好可惜。」童言童語引起其他人爆笑，搞到坐喺最外面嘅宋仲基都行過去摸摸金秀安個頭，父愛爆棚。

而喺戲中飾演獨立軍人嘅宋仲基就提到戲中嘅動作場面：「一開始睇劇本時，會有一個硬生生軍人嘅形象出現喺腦海。但睇多幾次劇本，就發現呢個角色唔止為咗救被困嘅韓國人民，而係為咗生存，所以比起更華麗嘅動作場面，會集中展現出實際中活用到嘅動作戲；至於蘇志燮就表示希望粉絲能夠喺戲中見到佢嘅另一面。

雖然柳昇完導演冇直接就臨記時薪低過最低工資一事解畫，不過就開腔感謝一班臨時演員：「一班臨時演員都好辛苦，為咗重現出當時嘅苦況，就算係臨時演員都要一齊與主演節食，喺困難嘅拍攝環境下依然消化得好好，見到佢哋嘅表現令我大表感動。男冇你哋(臨時演員)，呢齣作品一直無可能完成到，真心好感謝你哋，並好尊敬你哋能夠一直捱到最後。」