來源:蘋果日報 (2017.8.9)
http://hk.apple.nextmedia.com/enews/realtime/20170809/57059266
由韓國男神宋仲基、黃政民及蘇志燮主演嘅新片《軍艦島》,喺韓國上月26號已經上映,聽日香港亦會公映。而截至噚日《軍艦島》喺韓國累計觀影已逾626萬人次。
而《軍艦島》導演柳承完同一眾演員噚日就喺新加坡宣傳,根據當地傳媒報道噚晚7時舉行嘅見面會吸引約5千人逼爆三層新達城商場,場面墟冚。
據知粉絲為爭取靚位見偶像,一早6點已出動霸位,不少粉絲直言係捧宋仲基場,看來上月宣佈婚訊嘅宋仲基人氣未受影響。
到宋仲基等人出場時,全場粉絲尖叫不斷,佢哋亦十分識做,向粉絲揮手打招呼,宋仲基更有擺心心手勢冧粉絲。對於喺片中較遲先出場,宋仲基話自己唔會介意,亦覺得係導演刻意安排,從而帶出角色同故事,令故事發展得更好。而喺片中再度飾軍人嘅宋仲基笑言連埋之前入伍,加上拍攝《太陽的後裔》,佢已經有五年嘅軍人生活經驗,所以好投入角色。
全站熱搜
留言列表