wong zoe的部落格

來源: 蘋果日報(2014.8.8) 

蘇志燮喺活動上亦有反問粉絲問題，問大家喺Iron Man、猿人、小馬同長江7號之中鍾意佢扮演咩角色之餘，仲好曳曳咁問大家鍾意咩類型嘅kiss。

一個被蘇志燮抽中嘅粉絲就話，自己鍾意好似最後一日嘅深情kiss，因為好浪漫；之後蘇志燮就舉起手指公俾個like佢，又自爆鍾意蜻蜓點水多過激吻，話因為蜻蜓點水可以隨時隨地都做得喎!但大家聽完之後就好似唔多buy，蘇志燮就反問大家係咪可以隨時隨地激吻，粉絲大叫得，蘇志燮當堂嚇親，仲係咁流汗同抹汗，場面搞笑。

之後蘇志燮仲即場抽咗個粉絲，送咗特製、獨一無二嘅戒指俾對方。仲好sweet咁拖住個粉絲上台，親自為對方戴上戒指，搞到全場起哄。

之後蘇志燮就問粉絲究竟鍾意佢啲咩，粉絲就話鍾意佢靚仔，蘇志燮之後就做手勢叫粉絲繼續講鍾意佢嘅原因，講講下又突然拉個粉絲埋自己度，問對方做咩企咁遠！

當蘇志燮叫粉絲繼續講自己優點嘅時間，粉絲就突然同佢講自己係單身，搞到蘇志燮即場傻笑，仲問佢過唔過到現場粉絲嗰關添！落台之前，蘇志燮仲送上抱抱同護送佢落台，羨慕死人呀！

傾完一輪偈之後，蘇志燮就換上Hip Hop裝，化身rapper，同Hip Hop團Soul Dive一齊演出。之前蘇志燮喺成個訪談環節都好怕醜，但到唱歌嘅時候就360度大變身，型到爆之餘，仲喺台上又跳又叫，臨尾仲拎起口水槍射台下粉絲添，同現場粉絲玩到勁癲，完全唔似過去喺劇集嘅佢呀。演出過後，蘇志燮仲同在場每一個粉絲握手道別添！