wong zoe的部落格

來源: 蘋果日報(2014.8.8)

噚晚嘅九展騷上，蘇志燮準備咗一條事前同韓國搞笑男星鄭俊河一齊拍嘅短片俾大家睇，主題叫「我們不能和蘇志燮結婚的理由」。

片中鄭俊河男扮女裝，扮係蘇志燮嘅女朋友，接受都係由鄭俊河所扮嘅記者訪問，逐一講唔想同蘇志燮結婚嘅原因。

原因包括：
1.蘇志燮會成日掛住做運動忘記女朋友；
2.蘇志燮成日都逼人食飯搞到人哋減唔到肥；
3.成為蘇志燮女朋友會成為女人公敵等等

鄭俊河嘅演技真係令人笑爆肚，不過最後蘇志燮就喺片中澄清，話唔想同鄭俊河結婚，係因為已經同粉絲結咗婚喎，真係...冧到呢。

睇完片之後，蘇志燮就搞笑咁話同鄭俊河拍完片之後都唔知叫佢做哥哥定姐姐好，仲話鄭俊河喺拍片嗰時其實唔舒服，但係都好落力幫佢拍片，好多謝佢咁話。

講到結婚，大會司儀就趁機問下蘇志燮幾時打算結婚喇，蘇志燮就話年紀大咗，成日都有人問佢幾時結婚，接住就話如果有女朋友的話就一定會打算結婚，仲話相信粉絲都唔想佢成世一個人好孤獨咁生活喎。問到佢有冇諗過識個香港女仔時，蘇志燮就話：「隨時歡迎。」

講到佢會唔會好管未來女朋友時，蘇志燮就話如果對方唔講大話，基本上都唔會太管對方，因為自己係明星，成日會陪唔到對方覺得好對唔住，所以如果真係有女朋友都會好遷就對方咁話。不過講到會唔會管女朋友著衫，蘇志燮就依依哦哦仲幾秒，答唔到囉！